1 Alors le royaume des cieux sera semblable à dix vierges, lesquelles ayans pris leurs lampes, s'en allerent au devant de l'espoux.
2 Or il y en avoit d'icelles cinq sages, et cinq folles.
3 Les folles, en prenant leurs lampes n'avoyent point pris d'huile avec elles.
4 Mais les sages avoyent pris de l'huile en leurs vaisseaux avec leurs lampes.
5 Et comme l'espoux tardoit à venir, elles sommeillerent toutes, et s'endormirent.
6 Or à la minuict il se fit un cri, disant, Voici, l'espoux vient, sortez au devant de lui.
7 Alors ces vierges-là se leverent toutes, et appresterent leurs lampes.
8 Et les folles dirent aux sages, Baillez-nous de vostre huile: car nos lampes s'esteignent:
9 Mais les sages respondirent, disans, [Nous ne pouvons], de peur que nous n'en ayons point assez pour nous et pour vous: mais allez plustost vers ceux qui en vendent et en achetez pour vous-mesmes.
10 Or pendant qu'elles en alloyent acheter, l'espoux vint: et celles qui estoyent prestes entrerent avec lui aux nopces, et la porte fut fermée.
11 Puis apres les autres vierges vinrent aussi, disans, Seigneur, Seigneur, ouvre nous.
12 Mais il respondit, et dit, En verité je vous dis, que je ne vous connois point.
13 Veillez donc: car vous ne sçavez ni le jour ni l'heure, en laquelle le Fils de l'homme viendra.