1 讜职讛址诪旨侄诇侄讱职 讚旨指讜执讚 讝指拽值谉 讘旨指讗 讘旨址讬旨指诪执讬诐 讜址讬职讻址住旨只讛讜旨 讘旨址讘旨职讙指讚执讬诐 讜职诇止讗 讬执讞址诐 诇讜止 變
2 讜址讬旨止讗诪职专讜旨 诇讜止 注植讘指讚指讬讜 讬职讘址拽职砖讈讜旨 诇址讗讚止谞执讬 讛址诪旨侄诇侄讱职 谞址注植专指讛 讘职转讜旨诇指讛 讜职注指诪职讚指讛 诇执驻职谞值讬 讛址诪旨侄诇侄讱职 讜旨转职讛执讬志诇讜止 住止讻侄谞侄转 讜职砖讈指讻职讘指讛 讘职讞值讬拽侄讱指 讜职讞址诐 诇址讗讚止谞执讬 讛址诪旨侄诇侄讱职 變
3 讜址讬职讘址拽职砖讈讜旨 谞址注植专指讛 讬指驻指讛 讘旨职讻止诇 讙旨职讘讜旨诇 讬执砖讉职专指讗值诇 讜址讬旨执诪职爪职讗讜旨 讗侄转志讗植讘执讬砖讈址讙 讛址砖旨讈讜旨谞址诪旨执讬转 讜址讬旨指讘执讗讜旨 讗止转指讛旨 诇址诪旨侄诇侄讱职 變
4 讜职讛址谞旨址注植专指讛 讬指驻指讛 注址讚志诪职讗止讚 讜址转旨职讛执讬 诇址诪旨侄诇侄讱职 住止讻侄谞侄转 讜址转旨职砖讈指专职转值讛讜旨 讜职讛址诪旨侄诇侄讱职 诇止讗 讬职讚指注指讛旨 變
5 讜址讗植讚止谞执讬旨指讛 讘侄谉志讞址讙旨执讬转 诪执转职谞址砖旨讉值讗 诇值讗诪止专 讗植谞执讬 讗侄诪职诇止讱职 讜址讬旨址注址砖讉 诇讜止 专侄讻侄讘 讜旨驻指专指砖讈执讬诐 讜址讞植诪执砖旨讈执讬诐 讗执讬砖讈 专指爪执讬诐 诇职驻指谞指讬讜 變
6 讜职诇止讗志注植爪指讘讜止 讗指讘执讬讜 诪执讬旨指诪指讬讜 诇值讗诪止专 诪址讚旨讜旨注址 讻旨指讻指讛 注指砖讉执讬转指 讜职讙址诐志讛讜旨讗 讟讜止讘志转旨止讗址专 诪职讗止讚 讜职讗止转讜止 讬指诇职讚指讛 讗址讞植专值讬 讗址讘职砖讈指诇讜止诐 變
7 讜址讬旨执讛职讬讜旨 讚职讘指专指讬讜 注执诐 讬讜止讗指讘 讘旨侄谉志爪职专讜旨讬指讛 讜职注执诐 讗侄讘职讬指转指专 讛址讻旨止讛值谉 讜址讬旨址注职讝职专讜旨 讗址讞植专值讬 讗植讚止谞执讬旨指讛 變
8 讜职爪指讚讜止拽 讛址讻旨止讛值谉 讜旨讘职谞指讬指讛讜旨 讘侄谉志讬职讛讜止讬指讚指注 讜职谞指转指谉 讛址谞旨指讘执讬讗 讜职砖讈执诪职注执讬 讜职专值注执讬 讜职讛址讙旨执讘旨讜止专执讬诐 讗植砖讈侄专 诇职讚指讜执讚 诇止讗 讛指讬讜旨 注执诐志讗植讚止谞执讬旨指讛讜旨 變
9 讜址讬旨执讝职讘旨址讞 讗植讚止谞执讬旨指讛讜旨 爪止讗谉 讜旨讘指拽指专 讜旨诪职专执讬讗 注执诐 讗侄讘侄谉 讛址讝旨止讞侄诇侄转 讗植砖讈侄专志讗值爪侄诇 注值讬谉 专止讙值诇 讜址讬旨执拽职专指讗 讗侄转志讻旨指诇志讗侄讞指讬讜 讘旨职谞值讬 讛址诪旨侄诇侄讱职 讜旨诇职讻指诇志讗址谞职砖讈值讬 讬职讛讜旨讚指讛 注址讘职讚值讬 讛址诪旨侄诇侄讱职 變
10 讜职讗侄转志谞指转指谉 讛址谞旨指讘执讬讗 讜旨讘职谞指讬指讛讜旨 讜职讗侄转志讛址讙旨执讘旨讜止专执讬诐 讜职讗侄转志砖讈职诇止诪止讛 讗指讞执讬讜 诇止讗 拽指专指讗 變
11 讜址讬旨止讗诪侄专 谞指转指谉 讗侄诇志讘旨址转志砖讈侄讘址注 讗值诐志砖讈职诇止诪止讛 诇值讗诪止专 讛植诇讜止讗 砖讈指诪址注址转旨职 讻旨执讬 诪指诇址讱职 讗植讚止谞执讬旨指讛讜旨 讘侄谉志讞址讙旨执讬转 讜址讗植讚止谞值讬谞讜旨 讚指讜执讚 诇止讗 讬指讚指注 變
12 讜职注址转旨指讛 诇职讻执讬 讗执讬注指爪值讱职 谞指讗 注值爪指讛 讜旨诪址诇旨职讟执讬 讗侄转志谞址驻职砖讈值讱职 讜职讗侄转志谞侄驻侄砖讈 讘旨职谞值讱职 砖讈职诇止诪止讛 變
13 诇职讻执讬 讜旨讘止讗执讬 讗侄诇志讛址诪旨侄诇侄讱职 讚旨指讜执讚 讜职讗指诪址专职转旨职 讗值诇指讬讜 讛植诇止讗志讗址转旨指讛 讗植讚止谞执讬 讛址诪旨侄诇侄讱职 谞执砖讈职讘旨址注职转旨指 诇址讗植诪指转职讱指 诇值讗诪止专 讻旨执讬志砖讈职诇止诪止讛 讘职谞值讱职 讬执诪职诇止讱职 讗址讞植专址讬 讜职讛讜旨讗 讬值砖讈值讘 注址诇志讻旨执住职讗执讬 讜旨诪址讚旨讜旨注址 诪指诇址讱职 讗植讚止谞执讬指讛讜旨 變
14 讛执谞旨值讛 注讜止讚指讱职 诪职讚址讘旨侄专侄转 砖讈指诐 注执诐志讛址诪旨侄诇侄讱职 讜址讗植谞执讬 讗指讘讜止讗 讗址讞植专址讬执讱职 讜旨诪执诇旨值讗转执讬 讗侄转志讚旨职讘指专指讬执讱职 變
15 讜址转旨指讘止讗 讘址转志砖讈侄讘侄注 讗侄诇志讛址诪旨侄诇侄讱职 讛址讞址讚职专指讛 讜职讛址诪旨侄诇侄讱职 讝指拽值谉 诪职讗止讚 讜址讗植讘执讬砖讈址讙 讛址砖旨讈讜旨谞址诪旨执讬转 诪职砖讈指专址转 讗侄转志讛址诪旨侄诇侄讱职 變
16 讜址转旨执拽旨止讚 讘旨址转志砖讈侄讘址注 讜址转旨执砖讈职转旨址讞讜旨 诇址诪旨侄诇侄讱职 讜址讬旨止讗诪侄专 讛址诪旨侄诇侄讱职 诪址讛志诇旨指讱职 變
17 讜址转旨止讗诪侄专 诇讜止 讗植讚止谞执讬 讗址转旨指讛 谞执砖讈职讘旨址注职转旨指 讘旨址讬讛讜指讛 讗直诇止讛侄讬讱指 诇址讗植诪指转侄讱指 讻旨执讬志砖讈职诇止诪止讛 讘职谞值讱职 讬执诪职诇止讱职 讗址讞植专指讬 讜职讛讜旨讗 讬值砖讈值讘 注址诇志讻旨执住职讗执讬 變
18 讜职注址转旨指讛 讛执谞旨值讛 讗植讚止谞执讬旨指讛 诪指诇指讱职 讜职注址转旨指讛 讗植讚止谞执讬 讛址诪旨侄诇侄讱职 诇止讗 讬指讚指注职转旨指 變
19 讜址讬旨执讝职讘旨址讞 砖讈讜止专 讜旨诪职专执讬讗志讜职爪止讗谉 诇指专止讘 讜址讬旨执拽职专指讗 诇职讻指诇志讘旨职谞值讬 讛址诪旨侄诇侄讱职 讜旨诇职讗侄讘职讬指转指专 讛址讻旨止讛值谉 讜旨诇职讬止讗指讘 砖讉址专 讛址爪旨指讘指讗 讜职诇执砖讈职诇止诪止讛 注址讘职讚旨职讱指 诇止讗 拽指专指讗 變
20 讜职讗址转旨指讛 讗植讚止谞执讬 讛址诪旨侄诇侄讱职 注值讬谞值讬 讻指诇志讬执砖讉职专指讗值诇 注指诇侄讬讱指 诇职讛址讙旨执讬讚 诇指讛侄诐 诪执讬 讬值砖讈值讘 注址诇志讻旨执住旨值讗 讗植讚止谞执讬志讛址诪旨侄诇侄讱职 讗址讞植专指讬讜 變
21 讜职讛指讬指讛 讻旨执砖讈职讻址讘 讗植讚止谞执讬志讛址诪旨侄诇侄讱职 注执诐志讗植讘止转指讬讜 讜职讛指讬执讬转执讬 讗植谞执讬 讜旨讘职谞执讬 砖讈职诇止诪止讛 讞址讟旨指讗执讬诐 變
22 讜职讛执谞旨值讛 注讜止讚侄谞旨指讛 诪职讚址讘旨侄专侄转 注执诐志讛址诪旨侄诇侄讱职 讜职谞指转指谉 讛址谞旨指讘执讬讗 讘旨指讗 變
23 讜址讬旨址讙旨执讬讚讜旨 诇址诪旨侄诇侄讱职 诇值讗诪止专 讛执谞旨值讛 谞指转指谉 讛址谞旨指讘执讬讗 讜址讬旨指讘止讗 诇执驻职谞值讬 讛址诪旨侄诇侄讱职 讜址讬旨执砖讈职转旨址讞讜旨 诇址诪旨侄诇侄讱职 注址诇志讗址驻旨指讬讜 讗指专职爪指讛 變
24 讜址讬旨止讗诪侄专 谞指转指谉 讗植讚止谞执讬 讛址诪旨侄诇侄讱职 讗址转旨指讛 讗指诪址专职转旨指 讗植讚止谞执讬旨指讛讜旨 讬执诪职诇止讱职 讗址讞植专指讬 讜职讛讜旨讗 讬值砖讈值讘 注址诇志讻旨执住职讗执讬 變
25 讻旨执讬 讬指专址讚 讛址讬旨讜止诐 讜址讬旨执讝职讘旨址讞 砖讈讜止专 讜旨诪职专执讬讗志讜职爪止讗谉 诇指专止讘 讜址讬旨执拽职专指讗 诇职讻指诇志讘旨职谞值讬 讛址诪旨侄诇侄讱职 讜旨诇职砖讉指专值讬 讛址爪旨指讘指讗 讜旨诇职讗侄讘职讬指转指专 讛址讻旨止讛值谉 讜职讛执谞旨指诐 讗止讻职诇执讬诐 讜职砖讈止转执讬诐 诇职驻指谞指讬讜 讜址讬旨止讗诪职专讜旨 讬职讞执讬 讛址诪旨侄诇侄讱职 讗植讚止谞执讬旨指讛讜旨 變
26 讜职诇执讬 讗植谞执讬志注址讘职讚旨侄讱指 讜旨诇职爪指讚止拽 讛址讻旨止讛值谉 讜职诇执讘职谞指讬指讛讜旨 讘侄谉志讬职讛讜止讬指讚指注 讜职诇执砖讈职诇止诪止讛 注址讘职讚旨职讱指 诇止讗 拽指专指讗 變
27 讗执诐 诪值讗值转 讗植讚止谞执讬 讛址诪旨侄诇侄讱职 谞执讛职讬指讛 讛址讚旨指讘指专 讛址讝旨侄讛 讜职诇止讗 讛讜止讚址注职转旨指 讗侄转志注址讘职讚旨侄讬讱指 诪执讬 讬值砖讈值讘 注址诇志讻旨执住旨值讗 讗植讚止谞执讬志讛址诪旨侄诇侄讱职 讗址讞植专指讬讜 變 住
28 讜址讬旨址注址谉 讛址诪旨侄诇侄讱职 讚旨指讜执讚 讜址讬旨止讗诪侄专 拽执专职讗讜旨志诇执讬 诇职讘址转志砖讈指讘址注 讜址转旨指讘止讗 诇执驻职谞值讬 讛址诪旨侄诇侄讱职 讜址转旨址注植诪止讚 诇执驻职谞值讬 讛址诪旨侄诇侄讱职 變
29 讜址讬旨执砖旨讈指讘址注 讛址诪旨侄诇侄讱职 讜址讬旨止讗诪址专 讞址讬志讬职讛讜指讛 讗植砖讈侄专志驻旨指讚指讛 讗侄转志谞址驻职砖讈执讬 诪执讻旨指诇志爪指专指讛 變
30 讻旨执讬 讻旨址讗植砖讈侄专 谞执砖讈职讘旨址注职转旨执讬 诇指讱职 讘旨址讬讛讜指讛 讗直诇止讛值讬 讬执砖讉职专指讗值诇 诇值讗诪止专 讻旨执讬志砖讈职诇止诪止讛 讘职谞值讱职 讬执诪职诇止讱职 讗址讞植专址讬 讜职讛讜旨讗 讬值砖讈值讘 注址诇志讻旨执住职讗执讬 转旨址讞职转旨指讬 讻旨执讬 讻旨值谉 讗侄注直砖讉侄讛 讛址讬旨讜止诐 讛址讝旨侄讛 變
31 讜址转旨执拽旨止讚 讘旨址转志砖讈侄讘址注 讗址驻旨址讬执诐 讗侄专侄抓 讜址转旨执砖讈职转旨址讞讜旨 诇址诪旨侄诇侄讱职 讜址转旨止讗诪侄专 讬职讞执讬 讗植讚止谞执讬 讛址诪旨侄诇侄讱职 讚旨指讜执讚 诇职注止诇指诐 變 驻
32 讜址讬旨止讗诪侄专 讛址诪旨侄诇侄讱职 讚旨指讜执讚 拽执专职讗讜旨志诇执讬 诇职爪指讚讜止拽 讛址讻旨止讛值谉 讜旨诇职谞指转指谉 讛址谞旨指讘执讬讗 讜职诇执讘职谞指讬指讛讜旨 讘旨侄谉志讬职讛讜止讬指讚指注 讜址讬旨指讘止讗讜旨 诇执驻职谞值讬 讛址诪旨侄诇侄讱职 變
33 讜址讬旨止讗诪侄专 讛址诪旨侄诇侄讱职 诇指讛侄诐 拽职讞讜旨 注执诪旨指讻侄诐 讗侄转志注址讘职讚值讬 讗植讚止谞值讬讻侄诐 讜职讛执专职讻旨址讘职转旨侄诐 讗侄转志砖讈职诇止诪止讛 讘职谞执讬 注址诇志讛址驻旨执专职讚旨指讛 讗植砖讈侄专志诇执讬 讜职讛讜止专址讚职转旨侄诐 讗止转讜止 讗侄诇志讙旨执讞讜止谉 變
34 讜旨诪指砖讈址讞 讗止转讜止 砖讈指诐 爪指讚讜止拽 讛址讻旨止讛值谉 讜职谞指转指谉 讛址谞旨指讘执讬讗 诇职诪侄诇侄讱职 注址诇志讬执砖讉职专指讗值诇 讜旨转职拽址注职转旨侄诐 讘旨址砖旨讈讜止驻指专 讜址讗植诪址专职转旨侄诐 讬职讞执讬 讛址诪旨侄诇侄讱职 砖讈职诇止诪止讛 變
35 讜址注植诇执讬转侄诐 讗址讞植专指讬讜 讜旨讘指讗 讜职讬指砖讈址讘 注址诇志讻旨执住职讗执讬 讜职讛讜旨讗 讬执诪职诇止讱职 转旨址讞职转旨指讬 讜职讗止转讜止 爪执讜旨执讬转执讬 诇执讛职讬讜止转 谞指讙执讬讚 注址诇志讬执砖讉职专指讗值诇 讜职注址诇志讬职讛讜旨讚指讛 變
36 讜址讬旨址注址谉 讘旨职谞指讬指讛讜旨 讘侄谉志讬职讛讜止讬指讚指注 讗侄转志讛址诪旨侄诇侄讱职 讜址讬旨止讗诪侄专 讗指诪值谉 讻旨值谉 讬止讗诪址专 讬职讛讜指讛 讗直诇止讛值讬 讗植讚止谞执讬 讛址诪旨侄诇侄讱职 變
37 讻旨址讗植砖讈侄专 讛指讬指讛 讬职讛讜指讛 注执诐志讗植讚止谞执讬 讛址诪旨侄诇侄讱职 讻旨值谉 讬职讛执讬 注执诐志砖讈职诇止诪止讛 讜执讬讙址讚旨值诇 讗侄转志讻旨执住职讗讜止 诪执讻旨执住旨值讗 讗植讚止谞执讬 讛址诪旨侄诇侄讱职 讚旨指讜执讚 變
38 讜址讬旨值专侄讚 爪指讚讜止拽 讛址讻旨止讛值谉 讜职谞指转指谉 讛址谞旨指讘执讬讗 讜旨讘职谞指讬指讛讜旨 讘侄谉志讬职讛讜止讬指讚指注 讜职讛址讻旨职专值转执讬 讜职讛址驻旨职诇值转执讬 讜址讬旨址专职讻旨执讘讜旨 讗侄转志砖讈职诇止诪止讛 注址诇志驻旨执专职讚旨址转 讛址诪旨侄诇侄讱职 讚旨指讜执讚 讜址讬旨止诇执讻讜旨 讗止转讜止 注址诇志讙旨执讞讜止谉 變
39 讜址讬旨执拽旨址讞 爪指讚讜止拽 讛址讻旨止讛值谉 讗侄转志拽侄专侄谉 讛址砖旨讈侄诪侄谉 诪执谉志讛指讗止讛侄诇 讜址讬旨执诪职砖讈址讞 讗侄转志砖讈职诇止诪止讛 讜址讬旨执转职拽职注讜旨 讘旨址砖旨讈讜止驻指专 讜址讬旨止讗诪职专讜旨 讻旨指诇志讛指注指诐 讬职讞执讬 讛址诪旨侄诇侄讱职 砖讈职诇止诪止讛 變
40 讜址讬旨址注植诇讜旨 讻指诇志讛指注指诐 讗址讞植专指讬讜 讜职讛指注指诐 诪职讞址诇旨职诇执讬诐 讘旨址讞植诇执诇执讬诐 讜旨砖讉职诪值讞执讬诐 砖讉执诪职讞指讛 讙职讚讜止诇指讛 讜址转旨执讘旨指拽址注 讛指讗指专侄抓 讘旨职拽讜止诇指诐 變
41 讜址讬旨执砖讈职诪址注 讗植讚止谞执讬旨指讛讜旨 讜职讻指诇志讛址拽旨职专只讗执讬诐 讗植砖讈侄专 讗执转旨讜止 讜职讛值诐 讻旨执诇旨讜旨 诇侄讗直讻止诇 讜址讬旨执砖讈职诪址注 讬讜止讗指讘 讗侄转志拽讜止诇 讛址砖旨讈讜止驻指专 讜址讬旨止讗诪侄专 诪址讚旨讜旨注址 拽讜止诇志讛址拽旨执专职讬指讛 讛讜止诪指讛 變
42 注讜止讚侄谞旨讜旨 诪职讚址讘旨值专 讜职讛执谞旨值讛 讬讜止谞指转指谉 讘旨侄谉志讗侄讘职讬指转指专 讛址讻旨止讛值谉 讘旨指讗 讜址讬旨止讗诪侄专 讗植讚止谞执讬旨指讛讜旨 讘旨止讗 讻旨执讬 讗执讬砖讈 讞址讬执诇 讗址转旨指讛 讜职讟讜止讘 转旨职讘址砖旨讉值专 變
43 讜址讬旨址注址谉 讬讜止谞指转指谉 讜址讬旨止讗诪侄专 诇址讗植讚止谞执讬旨指讛讜旨 讗植讘指诇 讗植讚止谞值讬谞讜旨 讛址诪旨侄诇侄讱职志讚旨指讜执讚 讛执诪职诇执讬讱职 讗侄转志砖讈职诇止诪止讛 變
44 讜址讬旨执砖讈职诇址讞 讗执转旨讜止志讛址诪旨侄诇侄讱职 讗侄转志爪指讚讜止拽 讛址讻旨止讛值谉 讜职讗侄转志谞指转指谉 讛址谞旨指讘执讬讗 讜旨讘职谞指讬指讛讜旨 讘旨侄谉志讬职讛讜止讬指讚指注 讜职讛址讻旨职专值转执讬 讜职讛址驻旨职诇值转执讬 讜址讬旨址专职讻旨执讘讜旨 讗止转讜止 注址诇 驻旨执专职讚旨址转 讛址诪旨侄诇侄讱职 變
45 讜址讬旨执诪职砖讈职讞讜旨 讗止转讜止 爪指讚讜止拽 讛址讻旨止讛值谉 讜职谞指转指谉 讛址谞旨指讘执讬讗 诇职诪侄诇侄讱职 讘旨职讙执讞讜止谉 讜址讬旨址注植诇讜旨 诪执砖旨讈指诐 砖讉职诪值讞执讬诐 讜址转旨值讛止诐 讛址拽旨执专职讬指讛 讛讜旨讗 讛址拽旨讜止诇 讗植砖讈侄专 砖讈职诪址注职转旨侄诐 變
46 讜职讙址诐 讬指砖讈址讘 砖讈职诇止诪止讛 注址诇 讻旨执住旨值讗 讛址诪旨职诇讜旨讻指讛 變
47 讜职讙址诐志讘旨指讗讜旨 注址讘职讚值讬 讛址诪旨侄诇侄讱职 诇职讘指专值讱职 讗侄转志讗植讚止谞值讬谞讜旨 讛址诪旨侄诇侄讱职 讚旨指讜执讚 诇值讗诪止专 讬值讬讟值讘 讗直诇止讛侄讬讱指 讗侄转志砖讈值诐 砖讈职诇止诪止讛 诪执砖旨讈职诪侄讱指 讜执讬讙址讚旨值诇 讗侄转志讻旨执住职讗讜止 诪执讻旨执住职讗侄讱指 讜址讬旨执砖讈职转旨址讞讜旨 讛址诪旨侄诇侄讱职 注址诇志讛址诪旨执砖讈职讻旨指讘 變
48 讜职讙址诐志讻旨指讻指讛 讗指诪址专 讛址诪旨侄诇侄讱职 讘旨指专讜旨讱职 讬职讛讜指讛 讗直诇止讛值讬 讬执砖讉职专指讗值诇 讗植砖讈侄专 谞指转址谉 讛址讬旨讜止诐 讬止砖讈值讘 注址诇志讻旨执住职讗执讬 讜职注值讬谞址讬 专止讗讜止转 變
49 讜址讬旨侄讞侄专职讚讜旨 讜址讬旨指拽只诪讜旨 讻旨指诇志讛址拽旨职专只讗执讬诐 讗植砖讈侄专 诇址讗植讚止谞执讬旨指讛讜旨 讜址讬旨值诇职讻讜旨 讗执讬砖讈 诇职讚址专职讻旨讜止 變
50 讜址讗植讚止谞执讬旨指讛讜旨 讬指专值讗 诪执驻旨职谞值讬 砖讈职诇止诪止讛 讜址讬旨指拽指诐 讜址讬旨值诇侄讱职 讜址讬旨址讞植讝值拽 讘旨职拽址专职谞讜止转 讛址诪旨执讝职讘旨值讞址 變
51 讜址讬旨只讙旨址讚 诇执砖讈职诇止诪止讛 诇值讗诪止专 讛执谞旨值讛 讗植讚止谞执讬旨指讛讜旨 讬指专值讗 讗侄转志讛址诪旨侄诇侄讱职 砖讈职诇止诪止讛 讜职讛执谞旨值讛 讗指讞址讝 讘旨职拽址专职谞讜止转 讛址诪旨执讝职讘旨值讞址 诇值讗诪止专 讬执砖旨讈指讘址注志诇执讬 讻址讬旨讜止诐 讛址诪旨侄诇侄讱职 砖讈职诇止诪止讛 讗执诐志讬指诪执讬转 讗侄转志注址讘职讚旨讜止 讘旨侄讞指专侄讘 變
52 讜址讬旨止讗诪侄专 砖讈职诇止诪止讛 讗执诐 讬执讛职讬侄讛 诇职讘侄谉志讞址讬执诇 诇止讗志讬执驻旨止诇 诪执砖旨讉址注植专指转讜止 讗指专职爪指讛 讜职讗执诐志专指注指讛 转执诪旨指爪值讗志讘讜止 讜指诪值转 變
53 讜址讬旨执砖讈职诇址讞 讛址诪旨侄诇侄讱职 砖讈职诇止诪止讛 讜址讬旨止专执讚只讛讜旨 诪值注址诇 讛址诪旨执讝职讘旨值讞址 讜址讬旨指讘止讗 讜址讬旨执砖讈职转旨址讞讜旨 诇址诪旨侄诇侄讱职 砖讈职诇止诪止讛 讜址讬旨止讗诪侄专志诇讜止 砖讈职诇止诪止讛 诇值讱职 诇职讘值讬转侄讱指 變 驻