1 讻旨止讛志讗指诪址专 讗植讚止谞指讬 讬职讛讜执讛 砖讈址注址专 讛侄讞指爪值专 讛址驻旨职谞执讬诪执讬转 讛址驻旨止谞侄讛 拽指讚执讬诐 讬执讛职讬侄讛 住指讙讜旨专 砖讈值砖讈侄转 讬职诪值讬 讛址诪旨址注植砖讉侄讛 讜旨讘职讬讜止诐 讛址砖旨讈址讘旨指转 讬执驻旨指转值讞址 讜旨讘职讬讜止诐 讛址讞止讚侄砖讈 讬执驻旨指转值讞址 變
2 讜旨讘指讗 讛址谞旨指砖讉执讬讗 讚旨侄专侄讱职 讗讜旨诇指诐 讛址砖旨讈址注址专 诪执讞讜旨抓 讜职注指诪址讚 注址诇志诪职讝讜旨讝址转 讛址砖旨讈址注址专 讜职注指砖讉讜旨 讛址讻旨止讛植谞执讬诐 讗侄转志注讜止诇指转讜止 讜职讗侄转志砖讈职诇指诪指讬讜 讜职讛执砖讈职转旨址讞植讜指讛 注址诇志诪执驻职转旨址谉 讛址砖旨讈址注址专 讜职讬指爪指讗 讜职讛址砖旨讈址注址专 诇止讗志讬执住旨指讙值专 注址讚志讛指注指专侄讘 變
3 讜职讛执砖讈职转旨址讞植讜讜旨 注址诐志讛指讗指专侄抓 驻旨侄转址讞 讛址砖旨讈址注址专 讛址讛讜旨讗 讘旨址砖旨讈址讘旨指转讜止转 讜旨讘侄讞殖讚指砖讈执讬诐 诇执驻职谞值讬 讬职讛讜指讛 變
4 讜职讛指注止诇指讛 讗植砖讈侄专志讬址拽职专执讘 讛址谞旨指砖讉执讬讗 诇址讬讛讜指讛 讘旨职讬讜止诐 讛址砖旨讈址讘旨指转 砖讈执砖旨讈指讛 讻职讘指砖讉执讬诐 转旨职诪执讬诪执诐 讜职讗址讬执诇 转旨指诪执讬诐 變
5 讜旨诪执谞职讞指讛 讗值讬驻指讛 诇指讗址讬执诇 讜职诇址讻旨职讘指砖讉执讬诐 诪执谞职讞指讛 诪址转旨址转 讬指讚讜止 讜职砖讈侄诪侄谉 讛执讬谉 诇指讗值讬驻指讛 變
6 讜旨讘职讬讜止诐 讛址讞止讚侄砖讈 驻旨址专 讘旨侄谉志讘旨指拽指专 转旨职诪执讬诪执诐 讜职砖讈值砖讈侄转 讻旨职讘指砖讉执诐 讜指讗址讬执诇 转旨职诪执讬诪执诐 讬执讛职讬讜旨 變
7 讜职讗值讬驻指讛 诇址驻旨指专 讜职讗值讬驻指讛 诇指讗址讬执诇 讬址注植砖讉侄讛 诪执谞职讞指讛 讜职诇址讻旨职讘指砖讉执讬诐 讻旨址讗植砖讈侄专 转旨址砖旨讉执讬讙 讬指讚讜止 讜职砖讈侄诪侄谉 讛执讬谉 诇指讗值讬驻指讛 變
8 讜旨讘职讘讜止讗 讛址谞旨指砖讉执讬讗 讚旨侄专侄讱职 讗讜旨诇指诐 讛址砖旨讈址注址专 讬指讘讜止讗 讜旨讘职讚址专职讻旨讜止 讬值爪值讗 變
9 讜旨讘职讘讜止讗 注址诐志讛指讗指专侄抓 诇执驻职谞值讬 讬职讛讜指讛 讘旨址诪旨讜止注植讚执讬诐 讛址讘旨指讗 讚旨侄专侄讱职志砖讈址注址专 爪指驻讜止谉 诇职讛执砖讈职转旨址讞植讜止转 讬值爪值讗 讚旨侄专侄讱职志砖讈址注址专 谞侄讙侄讘 讜职讛址讘旨指讗 讚旨侄专侄讱职志砖讈址注址专 谞侄讙侄讘 讬值爪值讗 讚旨侄专侄讱职志砖讈址注址专 爪指驻讜止谞指讛 诇止讗 讬指砖讈讜旨讘 讚旨侄专侄讱职 讛址砖旨讈址注址专 讗植砖讈侄专志讘旨指讗 讘讜止 讻旨执讬 谞执讻职讞讜止 讬值爪职讗讜旨 變
10 讜职讛址谞旨指砖讉执讬讗 讘旨职转讜止讻指诐 讘旨职讘讜止讗指诐 讬指讘讜止讗 讜旨讘职爪值讗转指诐 讬值爪值讗讜旨 變
11 讜旨讘址讞址讙旨执讬诐 讜旨讘址诪旨讜止注植讚执讬诐 转旨执讛职讬侄讛 讛址诪旨执谞职讞指讛 讗值讬驻指讛 诇址驻旨指专 讜职讗值讬驻指讛 诇指讗址讬执诇 讜职诇址讻旨职讘指砖讉执讬诐 诪址转旨址转 讬指讚讜止 讜职砖讈侄诪侄谉 讛执讬谉 诇指讗值讬驻指讛 變 住
12 讜职讻执讬志讬址注植砖讉侄讛 讛址谞旨指砖讉执讬讗 谞职讚指讘指讛 注讜止诇指讛 讗讜止志砖讈职诇指诪执讬诐 谞职讚指讘指讛 诇址讬讛讜指讛 讜旨驻指转址讞 诇讜止 讗侄转志讛址砖旨讈址注址专 讛址驻旨止谞侄讛 拽指讚执讬诐 讜职注指砖讉指讛 讗侄转志注止诇指转讜止 讜职讗侄转志砖讈职诇指诪指讬讜 讻旨址讗植砖讈侄专 讬址注植砖讉侄讛 讘旨职讬讜止诐 讛址砖旨讈址讘旨指转 讜职讬指爪指讗 讜职住指讙址专 讗侄转志讛址砖旨讈址注址专 讗址讞植专值讬 爪值讗转讜止 變
13 讜职讻侄讘侄砖讉 讘旨侄谉志砖讈职谞指转讜止 转旨指诪执讬诐 转旨址注植砖讉侄讛 注讜止诇指讛 诇址讬旨讜止诐 诇址讬讛止讜指讛 讘旨址讘旨止拽侄专 讘旨址讘旨止拽侄专 转旨址注植砖讉侄讛 讗止转讜止 變
14 讜旨诪执谞职讞指讛 转址注植砖讉侄讛 注指诇指讬讜 讘旨址讘旨止拽侄专 讘旨址讘旨止拽侄专 砖讈执砖旨讈执讬转 讛指讗值讬驻指讛 讜职砖讈侄诪侄谉 砖讈职诇执讬砖讈执讬转 讛址讛执讬谉 诇指专止住 讗侄转志讛址住旨止诇侄转 诪执谞职讞指讛 诇址讬讛讜指讛 讞只拽旨讜止转 注讜止诇指诐 转旨指诪执讬讚 變
15 讜址注指砖讉讜旨 讗侄转志讛址讻旨侄讘侄砖讉 讜职讗侄转志讛址诪旨执谞职讞指讛 讜职讗侄转志讛址砖旨讈侄诪侄谉 讘旨址讘旨止拽侄专 讘旨址讘旨止拽侄专 注讜止诇址转 转旨指诪执讬讚 變 驻
16 讻旨止讛志讗指诪址专 讗植讚止谞指讬 讬职讛止讜执讛 讻旨执讬志讬执转旨值谉 讛址谞旨指砖讉执讬讗 诪址转旨指谞指讛 诇职讗执讬砖讈 诪执讘旨指谞指讬讜 谞址讞植诇指转讜止 讛执讬讗 诇职讘指谞指讬讜 转旨执讛职讬侄讛 讗植讞只讝旨指转指诐 讛执讬讗 讘旨职谞址讞植诇指讛 變
17 讜职讻执讬志讬执转旨值谉 诪址转旨指谞指讛 诪执谞旨址讞植诇指转讜止 诇职讗址讞址讚 诪值注植讘指讚指讬讜 讜职讛指讬职转指讛 诇旨讜止 注址讚志砖讈职谞址转 讛址讚旨职专讜止专 讜职砖讈指讘址转 诇址谞旨指砖讉执讬讗 讗址讱职 谞址讞植诇指转讜止 讘旨指谞指讬讜 诇指讛侄诐 转旨执讛职讬侄讛 變
18 讜职诇止讗志讬执拽旨址讞 讛址谞旨指砖讉执讬讗 诪执谞旨址讞植诇址转 讛指注指诐 诇职讛讜止谞止转指诐 诪值讗植讞只讝旨指转指诐 诪值讗植讞只讝旨指转讜止 讬址谞职讞执诇 讗侄转志讘旨指谞指讬讜 诇职诪址注址谉 讗植砖讈侄专 诇止讗志讬指驻只爪讜旨 注址诪旨执讬 讗执讬砖讈 诪值讗植讞只讝旨指转讜止 變
19 讜址讬职讘执讬讗值谞执讬 讘址诪旨指讘讜止讗 讗植砖讈侄专 注址诇志讻旨侄转侄祝 讛址砖旨讈址注址专 讗侄诇志讛址诇旨执砖讈职讻讜止转 讛址拽旨止讚侄砖讈 讗侄诇志讛址讻旨止讛植谞执讬诐 讛址驻旨止谞讜止转 爪指驻讜止谞指讛 讜职讛执谞旨值讛志砖讈指诐 诪指拽讜止诐 讘旨址讬旨址专职讻止转执诐 讬指诪旨指讛 變 住
20 讜址讬旨止讗诪侄专 讗值诇址讬 讝侄讛 讛址诪旨指拽讜止诐 讗植砖讈侄专 讬职讘址砖旨讈职诇讜旨志砖讈指诐 讛址讻旨止讛植谞执讬诐 讗侄转志讛指讗指砖讈指诐 讜职讗侄转志讛址讞址讟旨指讗转 讗植砖讈侄专 讬止讗驻讜旨 讗侄转志讛址诪旨执谞职讞指讛 诇职讘执诇职转旨执讬 讛讜止爪执讬讗 讗侄诇志讛侄讞指爪值专 讛址讞执讬爪讜止谞指讛 诇职拽址讚旨值砖讈 讗侄转志讛指注指诐 變
21 讜址讬旨讜止爪执讬讗值谞执讬 讗侄诇志讛侄讞指爪值专 讛址讞执讬爪止谞指讛 讜址讬旨址注植讘执讬专值谞执讬 讗侄诇志讗址专职讘旨址注址转 诪执拽职爪讜止注值讬 讛侄讞指爪值专 讜职讛执谞旨值讛 讞指爪值专 讘旨职诪执拽职爪止注址 讛侄讞指爪值专 讞指爪值专 讘旨职诪执拽职爪止注址 讛侄讞指爪值专 變
22 讘旨职讗址专职讘旨址注址转 诪执拽职爪止注讜止转 讛侄讞指爪值专 讞植爪值专讜止转 拽职讟只专讜止转 讗址专职讘旨指注执讬诐 讗止专侄讱职 讜旨砖讈职诇止砖讈执讬诐 专止讞址讘 诪执讚旨指讛 讗址讞址转 诇职讗址专职讘旨址注职转旨指诐 诪职讛只拽职爪指注讜止转 變
23 讜职讟讜旨专 住指讘执讬讘 讘旨指讛侄诐 住指讘执讬讘 诇职讗址专职讘旨址注职转旨指诐 讜旨诪职讘址砖旨讈职诇讜止转 注指砖讉讜旨讬 诪执转旨址讞址转 讛址讟旨执讬专讜止转 住指讘执讬讘 變
24 讜址讬旨止讗诪侄专 讗值诇指讬 讗值诇旨侄讛 讘旨值讬转 讛址诪职讘址砖旨讈职诇执讬诐 讗植砖讈侄专 讬职讘址砖旨讈职诇讜旨志砖讈指诐 诪职砖讈指专职转值讬 讛址讘旨址讬执转 讗侄转志讝侄讘址讞 讛指注指诐 變