35 But it was don, whanne Jhesus cam nyy to Jerico, a blynde man sat bisidis the weie, and beggide.
36 And whanne he herde the puple passynge, he axide, what this was.
37 And thei seiden to hym, that Jhesus of Nazareth passide.
38 And he criede, and seide, Jhesu, the sone of Dauyd, haue mercy on me.
39 And thei that wenten bifor blamyden hym, that he schulde be stille; but he criede myche the more, Thou sone of Dauid, haue mercy on me.
40 And Jhesus stood, and comaundide hym to be brouyt forth to hym. And whanne he cam nyy, he axide hym,
41 and seide, What wolt thou that Y schal do to thee? And he seide, Lord, that Y se.
42 And Jhesus seide to hym, Biholde; thi feith hath maad thee saaf.
43 And anoon he say, and suede hym, and magnyfiede God. And al the puple, as it say, yaf heriyng to God.