1 In tho daies Joon Baptist cam, and prechide in the desert of Judee,2 and seide, Do ye penaunce, for the kyngdom of heuenes shal neiye.3 For this is he, of whom it is seid bi Ysaie, the prophete, seyinge, A vois of a crier in desert, Make ye redi the weies of the Lord; make ye riyt the pathis of hym.4 And this Joon hadde clothing of camels heeris, and a girdil of skynne aboute hise leendis; and his mete was honysoukis, and hony of the wode.5 Thanne Jerusalem wente out to hym, and al Judee, and al the cuntre aboute Jordan;6 and thei weren waischun of hym in Jordan, and knowlechiden her synnes.